Postuar më: 09 Qershor 2018

Fjala e ministrit Ditmir Bushati me rastin e dhënies së titullit “Qytetar Nderi” i Malësisë së Madhe, Profesorit Rexhep Qosja

9 qershor 2018

 

Jam i nderuar dhe me plot emocione që më jepet mundësia të them dy fjalë për mendimtarin e lirë, gjithnjë në shërbim të vlerave dhe traditave më të mira të kombit shqiptar dhe kërkuesin e palodhur ndaj së vërtetës, Profesor Rexhep Qosja.

Vepra e Profesor Rexhep Qosjes ka një shtrirje kohore prej rreth gjysmë shekulli dhe ai është padyshim një nga figurat më të ndritura shqiptare të kohës sonë. Një rilindas i mirëfilltë me fjalë e vepra, i cili me mjeshtëri dhe me përulësi ka kontribuar në pasurimin e gjuhës sonë të lashtë, në stilistikën e prozës, në studimet letrare dhe gjuhësore dhe në zhvillimet politike të trevave shqiptare.

Të flasësh për krijimtarinë letrare të akademikut Rexhep Qosja i tejkalon aftësitë e mia të një amatori të letrave. E megjithatë të shijosh të bukurën nuk ka nevojë të jesh kritik arti. Vepra si “Vdekja më vjen prej syve të tillë” apo “Një dashuri dhe shtatë faje” janë vetëm dy prej monumenteve të një prej rapsodëve më të shquar shqiptarë (post-modernistë), profesor Rexhep Qosjes.

Gjithnjë në kërkim të së vërtetës, edhe në kohëra kur e vërteta ishte ilegale, ai është shembulli perfekt i thënies se “pena është më e fortë se shpata”.

Me mendimet e tij të mprehta dhe autokritikën e pashoqe ai ka bërë që klasa politike shqiptare në të dyja anët e kufirit të gjejë te kritika e Profesor Qosjes një lloj “guri prove” mbi drejtësinë e kursit të mendimit dhe veprimit shqiptar. Fuqia e mendimit të tij buron nga fakti se ai ka qenë kritik më i ashpër ndaj vetes se sa ndaj tjetrit edhe kur ai vetë ka qenë protagonist kryesor i ngjarjeve me peshë historike.

Bir i kësaj toke legjendare, Kelmendit, që do të thotë toka e të urtëve, e të thjeshtëve dhe e të mirëve, ai merr sot një nderim që ndonëse nuk e ka shkëlqimin e çmimeve të akademive të nalta, përbën mirënjohjen që toka që e lindi, i blaton birit të saj.

Titulli “Qytetar Nderi” i Malësisë së Madhe që i akordohet sot tregon se historia nderon pakicën e veçantë që shumica nuk mund ta harrojë.

Profesor, jetë sa më të gjatë dhe ta gëzoni këtë titull me të afërmit dhe të dashurit Tuaj.

Ju faleminderit!