Postuar më: 22 Maj 2018

Ministri Bushati pret në takim Komisioneren e Këshillit të Evropës për të Drejtat e Njeriut, Znj. Dunja Mijatović

Më 22 maj 2018, Ministri për Evropën dhe Punët e Jashtme, Ditmir Bushati, zhvilloi një takim me Komisioneren e Këshillit të Evropës për të Drejtat e Njeriut, Dunja Mijatović. Takimi u zhvillua në kuadër të vizitës së saj të parë në vendin tonë, pas marrjes së detyrës në prill 2018.  Fokusi i vizitës kishte të bënte me të drejtat e fëmijëve, të drejtat e personave me aftësi të kufizuara dhe aksesi në drejtësi.

Në fillim të takimit, Ministri Bushati, uroi Komisioneren Mijatović për zgjedhjen në postin e Komisionerit të KiE-së për të Drejtat e Njeriut, si gruaja e parë në këtë post dhe Komisioneri i parë nga Rajoni. Ai vuri theksin tek angazhimet e Shqipërisë në drejtim të respektimit të të drejtave të njeriut, në kuadër të veprimtarisë së organizatave ndërkombëtare, posaçërisht edhe të Këshillit të Evropës, por edhe si pjesë e angazhimeve për hapjen e bisedimeve me BE. Mbrojta e të drejtave të fëmijëve, grave, lufta kundër dhunës në familje, janë angazhime jo vetëm të Qeverisë shqiptare, por edhe të gjithë shoqërisë, tha Ministri Bushati.

Komisionerja Mijatović, përshëndeti Shqipërinë për hapat e bërë në drejtim të mbrojtjës të të drejtave të njeriut, veçanërisht, të fëmijëve dhe grave, por edhe të personave të tjerë në nevojë duke nxitur bashkëpunimin midis Qeverisë dhe përfaqësuesve të këtyre shtresave, si edhe shoqërisë civile, në përgjithësi. Ky është një dimension i rëndësishëm i veprimtarisë së Këshillit të Evropës, ku do te jetë e përqendruar edhe puna e Komisionerit për Mbrojtjen e të Drejtave të njeriut, tha znj. Mijatovic. Besoj në bashkëpunimin e frytshëm dhe të vazhdueshëm midis Shqipërisë dhe Zyrës së Komisionerit në këtë drejtim, u shpreh ajo.

Komisionerja Mijatović, do të ketë takime në ditët në vijim edhe me anëtarë të tjerë të Kabinetit Qeveritar, me përfaqësues të shoqërisë civile si dhe të shoqatave dhe institucioneve që trajtojnë këto shtresa vulnerable.